واش بصح الفن المغربي فيه منافسة ولا كولا وبراكتو ؟

واش بصح الفن المغربي فيه منافسة ولا كولا وبراكتو ؟

بقلم : يونس نصيري 

فالأيام الأخيرة خرج جدل كبير على مواقع التواصل الاجتماعي من خلال فيديوهات ونقاشات حول سؤال واحد: شكون هو أحسن مغني شعبي فالساحة الفنية المغربية ؟ وشكون الفنان اللي معندوش منافس؟ نقاش جر معاه آراء مختلفة بين مؤيد لهذا الاسم أو ذاك، وسط مقارنات ومحاولات لوضع ترتيب للفنانين حسب الشعبية وعدد المشاهدات والحضور الجماهيري.

ولكن السؤال الحقيقي اللي كيبقى مطروح: واش الفن المغربي ديما كان مبني على المنافسة؟ ولا كان تفكير آخر مبني على التعاون وتقديم الإضافة للساحة الفنية؟

إذا رجعنا شوية للور ففترات سابقة كانت أسماء و مدارس كبيرة بحال محمد رويشة ،ميلود المغاري ،حادة وعكي و لائحة طويلة ... حاضرين بقوة وسط الساحة الفنية

 لكن المتتبعين كيشوفو بأن العلاقة بين الفنانين فداك الوقت كانت فيها تقارب أكبر وكل فنان كيحاول يخلق لون خاص به دون الدخول فصراعات حول من الأفضل ومن الأقوى. وكان الاهتمام أكثر منصب على ترك بصمة فنية تبقى فذاكرة الجمهور.

اليوم يبدو أن المشهد الفني تبدل نسبياً خصوصاً مع قوة مواقع التواصل الاجتماعي اللي ولات كتخلق نقاشات يومية ومقارنات مستمرة بين الفنانين، بينما كيبان من جهة أخرى أن موجة التعاونات الفنية والأعمال المشتركة ولات حاضرة بقوة داخل الساحة المغربية وحتى خارجها.